Մատուռը կառուցվել է 1870-ական թվականներին։ Կառույցը սիրված վայր է դարձել ինչպես բնակիչների, այնպես էլ  զբոսաշրջիկների և հովեկների համար, ովքեր գալիս են աղոթելու, հանգստություն գտնելու և վերականգնվելու։ Այն գտնվում է բլրի վրա, որտեղից բացվում է  չքնաղ տեսարան, շրջապատված է գեղատեսիլ ու խիտ անտառներով, ինչը մատուռին տալիս է միանգամայն յուրահատուկ հմայք։

Սուրբ Աստվածածնի բարեխոսության եկեղեցու շինարարությունը սկսվել է 19-րդ դարի կեսերին , որն ավարտվել է 1901թ․ զանգերի տեղադրմամբ։ Չնայած, որ զանգը տեղադրվել էր եկեղեցու կառուցումից տարիներ անց, այն գործող է եղել։   

Պահպանվել են կառույցի  չափաբերական մատյանները և տաճարի վանահայրերի անվանացանկը՝ սկսած 1885 թվականից․ օրինակ` Իլյա Խանդամովը հոգևորական ծառայություն է իրականացրել 1885-1895 թթ․, Գրիգորի Բունիաթովը՝ 1895-1900թթ․, Յակով Բոգատիրյովը՝ 1900-1901 և այլն։  

Խորհրդային իշխանության հաստատումից հետո եկեղեցին դադարել է գործել։ Այն ծառայում էր սկզբում որպես կինոթատրոն, հետո որպես պահեստ։ 1989թ․ Սուրբ Աստվածածնի եկեղեցին հայտնվել է վթարային վիճակում։

2015թ․ բանասիրական  գիտությունների դոկտոր Միքայել Ամիրխանյանի ջանքերի շնորհիվ սկսվել է եկեղեցու վերականգնման գործընթացը։ ՀՀ քաղաքաշինության նախարարությունը աջակցել է շինության տանիքի վերականգնման առաջարկին՝ դիմելով Լոռու մարզպետարան և Ուրասարի գյուղապետին՝ նախաձեռնությանն աջակցելու խնդրանքով։ Հենց այդպես, եկեղեցին տանիք ձեռք բերեց, տեղադրվել են դռներ և պատուհաններ, մաքրվել են  ներսի հատվածն ու բակը։

Նախաձեռնությանը միացել է  նաև Հայ Առաքելական Եկեղեցու Գուգարաց թեմի առաջնորդ Սեպուհ արքեպիսկոպոսը (Չուլջյան)։

Տոներին եկեղեցի են գալիս քահանաներ  և պատարագ մատուցում։ 

Լուսաղբյուրը Կաթնաղբյուր գյուղի միակ մատուռն է։ Այն կառուցվել է 1952 թվականին Սինամ Մարտիրոսի Միրզոյանի կողմից գետնի տակից բխող հանքային ջրի վրա։

Աղբյուրի ջուրը հարուստ է հանքային աղերով և ունի բուժիչ հատկություն։

Գյուղի երիտասարդների ջանքերով այժմ փոքրիկ մատուռը վերածվել է փոքրիկ եկեղեցու։

․https://www.youtube.com/watch?v=Tm2VBE3QF_0